Fasnachtsbangg 2024

 

Am 26. Februar 2023 simmer deert obe gstande

D Wäägeliyiweihig als erschts risse highlight, bestande.

Dir alli liebi Fründe, Liebi Familie, liebi Fans, Liebi Passivi und liebi Gönner händ das möglich gmacht

Und dr Yyschtig zu de drey scheenschte Däg isch gsi, e Pracht.

Sigs mit eurem Applaus, eurem lache , eurer positive Stimmig,

Eurer glückliche und z’friidene Ustraalig und überhaupt nit grimmig.

Mit eurem Zustupf sigs mit em Fülle vo dr WAGGINA

Oder mit dr sensationelle Mehlsuppe vo dr Milena.

Aber au eifach euer Erschiine und mit uns d’Vorfreud teile

Uf die drey wunderschöne Däg Basler Fasnacht, die geile.

Jetzt, wenn ich hüt do in d Rundi lueg krieg ich au scho wider Hienerhut.

Jubeld gsehni euch wider do bi uns SALUT, kömmet sind emol lut!!!

Jo genau, au wider lut isch d Fasnacht 2023 gsi,

Keini Iischränggige me, back to the roots, au d’Wääge wider drbi.

Back to the roots, also zrugg zu de Wurzle sind au d’ Combonischte gange, 

Wobi uf unseri Wurzle, mir lang händ miesse blange. 

Wurzle oder dr Anker, wo eigentlich jedi Clique oder Gugge brucht,

Hän mir 14 Joor miesse warte, es het uns gschluucht.

Aber letscht Joor simmer ändligg in dä Gnuss ko und wie,

E Vortrab hämmer gha wie no nie!

Wie dankbar mir Euch sind, könne dir nit glaube,

Keini Nächt me, wo uns dr Schloof duet raube.

Dangge Tatjana, Alex und Michel für eure geniale Isatz

Und mir hoffe, dir findet ab däm Joor e fixe Platz.

E Platz als richtige Combonsicht mit Kostüm und Larve wie mir,

Daaas git e Bild, ich weiss es, vertrauet mir.

Über Details könne mir uns jo no unterhalte, 

Und alles genau bespräche und verwalte.

Denn so gueti Lüt wie euch losst me nit gärn los,

Wo uns Combonischte durch d’Strosse fiert so gross.

Us däm Grund scho jetzt e härzliggs Dangge mir hebe s Glas,

Für mi sind dir scho jetzt mini Stars.

Oder wie dr Alex würd schreie DE LA MUERTE !

 

DE LA MUERTE heiss so vill wie GEIL…..!!!

So hämmer an dr Fasnacht e Improvisierts Schlagsolo ahne gleggt,

Im Hof vom Spiegelhof hämmer uns zu däm Rhythmus bewegt. 

Im Hof vom Leonards Stapfelbärg hämmer am Mittwuch z’Nacht mit de Passive unser Fondue gnosse,

Und die erschte, bald isch es fertig, Tränli vergosse.

Schwerfällig simmer Richtig Pfalz und Richtig Rhysprung

Nur no liislig ghört me die letschte Fasnachtsdöön fascht stumm.

Begleitet vo e paar Fans, Passive und de Flauschis stöön mir in Kreis,

Mir hebe s’ Glas und nämme no eins.

Mit em schönschte Paloma ever hämmer d’Fasnacht 2023 gschlosse und wie jedes Joor e huffe Trände vergosse.

Nit nur dr Frau Fasnacht hämmer Adie gseit,

Au unserem treue Combowäägeli wo uns het druch d’Gasse treit.

Fascht 14 Joor isch es mit uns gloffe synchron

Und dorum letscht Joor wohlverdient in sini Pension.

DANGGE NOMOL ALLNE WO IRGENDWIE MITGWÜRGT HÄND FÜR E TOLLI FASNACHT 2023

UND DENN DR START INS FASNACHTS JOOR 2024.

 

Wie allewyyl isch es am schnällschte bim Peeeedro gschtartet,

Dr Räscht het gespannt druff gewartet,

Wie die neue Lieder wärde dööne wo dr Peeeedro gschribe het

Au euch wärde si gfalle, ich mach e Wett.

No e bitz Geduld mien dir leider no ha

Z’erscht muess ich zum Änd ko mit mim blabla.

Nur in einer Sach könnte dir uns behilflich si,

Die Näme vo däne Lieder göön uns einfach nit ins Hirni dri.

Supersfaction?

Sätistischen?

Updownfaction?

Sätisfaction?

Mir wüsses nie welles spiile mir jetzt genau?

Mol luege vellicht wirdsch DU denn druss schlau.

E paar wenigi vo euch händ seint oder ander neui scho dörfe ghööre,

Sigs an unserem Probeweekend e witter GEILS ich schwöre.

 

Wo nit nur unseri neue Lieder e neus Level erreicht hän

Sondern au s’ schnarche im Masselager unaagnääms gänn.

Apropo Probeweekend im Skylla,

Wie dir wüsset unseri heissgliebti Villa

Händ neu au unseri Passive dörfe iine loose,

Dörts mol mit lutem getoose.

Nei nit nur vo Trompete, Posaune, Schlag und Pauke döön,

Sondern mit Tannerusche, Wind, Räge und heftigem Sturm.

Und wie immer im Läbe alles eso kunnt wies muess,

Schicke mir im Mike vorus e liebe Gruess,

Er söll doch bitte nomol 6 Fläsche wysse bringe

Und no schnäll in Denner springe.

Zu fescht hämmer scho möge drinke

In unserne Trainerhoose und Finke.

Dr Mike nit schüch, use us de Trainer Schlüch und ab in Karre

Und sofort in e Denner gfaare.

Uf das nomol e Dank mit Klasse

Dorum nomol alli hoch die Tasse.

Wie dir au mitlerwyyle wüsset isch es tradition,

Unseri Kidchenparty, letscht mol au die innere andere Dimension.

Au im Levin schnäll e Geischtesblitz ins Hirni jaggt

No schnäll mit Schritt im Taggt

In Pearl marschiert 

Und mit Schächteli ins Skylla yy marschiert.

E Kidchenparty ohni Liecht goot jo gar nit oder nit?

Abwarte…… installiere…….Probiere…… SHIT…….

100m wyt ich meinti strahle die lichter us em Kuchi Fänschter

Und verbanne garantiert alli ungwollte Gschpängschter.

On Top kunnt dr Mike umme Egge mitere Musigbox

Comon everybody dancing in the house, move your socks.

Liebi Passivi und die wos no möchte wärde,

Es isch eifach e Event so e Skylla in dr Combonischte Härde.

 

Ein Event kommt selten allein

Gäld muess aane in unser Sparschwein.

Denn schliesslig simmer e Gugge wo keini Subventione kriegt

Und dorum alles elei eins ums andere fiegt.

Doch Gäld ohni Spass goot jo gar nit und wär schade

Dorum hämmer ins Läbe grueffe unseri UNO Olympiade.

Wie mir mien sage e absoluts Highlight und mir händ so freud

Jegliche Schweiss, organisiere Vorbereite mir händs nit bereut.

Danke au an däre stell nomol für euri Unterstützig

Und bliibet witterhin so witzig und guethärzig.

E spezielle Dangg zu däm Event möchti do im Simon widdme

Wo ganz schnäll in Zahlealgorhytme,

Dr Spielstand vo de UNO Partie für uns usgrächnet het

Und uns so zyt erspaarnis ii gruumt het.

DANKE LIEBE SIMON für unsere Verkünder vo Spielresultat

Oder unsere Gäld iitriber verkünd Advokat.

 

Mit Euch mache UNO Events, Skylla Villas, Wägeli Yiweihige, Fasnacht’s oder Bummel bsiech e bsundere Schmaus

Dorum Combonischt jetzt vo uns an sie e Applaus.

 

Händr gmergt?.... das unsere Applaus lütter döönt als letscht Joor.

Nit? Doch, doch es isch nit glooge es isch wirgligg woor.

Dr Grund isch ganz schnäll verzellt und kunnt nit us China

Nei, es döönt lütter wäge unserem neue Mitglied dr Sabrina.

Liebi Sabrina, ich wünsch dir vo härze mit däm Start vo dr Wäägliyiweihig zu de drei scheenschte Däg e wunder schöni 1. Offizielli Fasnacht als Aktivi und das erscht no bi dr geilschte Combo vo Basel. Schön ghörsch du zu uns.

 

Ahaaa do gsehni aber öbbis….

Fallt euch au öbbis uff?

Irgendwie findi hämmer do bitz e Puff.

D’ Mehlsuppe, d Bächer, Täller und s’ Apero gebäck stoot nit dert wie allewyyl.

Uf em Bänkli däm Müürli am Bode he nei.

Das isch doch nit unsere style..

Ah jo ich weiss scho, stimmt jo ich has jo vorhär verzellt.

Unser Combonischte Wäägeli isch jo nümm do, wo mir die Sache druff händ abgschtellt.

Logisch dir kennet uns und die wo modärn sind händ’s jo scho könne vernäh,

E neue Kaare hämmer uns nit lo nää.

Im Summer bi knapp 40°C und vill Schweiss

Hämmer aa gfange mit dr Gundierig mole,

Und bi minus Temperature dr letschti Schliff isch nit grad zum woole.

Verfolge händ ihr uns könne uf Facebook Whats App oder Insta stories wie mir schaffe,

Nei, es bringt no nüt wenn dir jetzt dört übere dien gaffe.

Bevor mir unser Wärk enthülle,

Mien mir zerscht nomol unseri Bächer fülle.

 

Das mol möchti s’Glas für mini Eltere erhebe

Und mini Stimm luter und zum beebe hebe!

Denn ooni sie würd unser neu wäägeli glaub nit hüt do stoo

Und mir miesstes no in dr Werkstatt lo.

 

Oft het uns e Wärkzüg gfählt oder d’ Lösig für e Umsetzig het nit welle ko,

E Telefon an dr Papi und er het d’ Lösig… Doo!

He, das isch doch ganz eifach, hets oft heisse denn,

He jo klar… logisch….! Sorry bi nit so clever man.

DANKE FÜR EURE SUPPORT EURI UNTERSTÜTZIG IMMER DENN WENN MIR EUCH BRUCHE!

 

Woni mir Gedanke gmacht ha über s’ Joor 2023

Was ich in däm Schnitzelbank bring hüt so im 2024,

Hani dänggt mmmh isch gar nit so vill zum reime,

Und villes isch au nit verborge im Gheime.

Und doch bini immer nonig am Änd

Ich hoff dir händ no warmi Händ.

 

S’ Joor 2024 isch e speziells Joor für d’ Combonischte, 

Mir fiire s’ 15 Joor Jubiläum, heftigi Kischte.

Scho 15 Joor gsehsch uns uf dr Gass,

Und je länger wie s’goot mit höherer Klass.

Mir sind stolz und gligglig als glaini Combo 

Nach 15 Joor immer no könne bestoo

Und Joor für Joor durch d’ Gasse go.

Das mir nit gändet händ bereits als Fosilie,

Nei im Gegeteil mir uns könne betittle als Familie,

Das isch uns vill Wärt und git uns halt

Und mir eso no lang könne bestoo und wärde no sehr alt.

Dorum hebet s’ Glas and sing and pray

E very lovely Happy Birthday!

 

HAPPY BIRHTDAY TO YOU….

 

Do goot s’ Härz vom Bebbi uf

Keine blibt bi däm gsang muff.

Au wenns uns mängmol d’ Wält e andere Spiegel vorhebt,

So wie vergangnigs Joor d’ Ärde in dr Türkei erbeebt.

Dr Bärg in Brienz dr halt verliert

Oder d’Hamas jetzt Israel regiert.

Ukreine und Russland dr Friide nonig gfunde hänn

Und sich noch bald 2 Joor immer no uf d’ Kappe gänn.

Prinze vo England doch no zu Könige Ände

Oder me d Tina Turner verabschiidet als unseri Rocklegände.

167 Joor e Ära z’änd goht e risse Riss

S’änd vo unserer Bank dr Credit Swiss

Das es wider e Ufsteller bruucht hi und do isch doch s’Bescht

Zum Beispiel unser Basler Hafefescht.

Oder flaniersch mitere neue Friise früsch vom Coiffure

Im Summer top gstylet am Flaneur.

Au e Schwumm im Rhy mit wurscht uf em Grill oder Käs

Oder e laue freudige Obe am Bebbi sim Jazz.

Das git uns kraft und git eim Muet

Me nit immer am druurig und dunggle studiere muess.

Es treit eim und losst eim liecht lo füüle

Und me nit muess im Egge hogge und hüüle. 

Es tribt eim zu Glügg, Fraid und Seeligkeit

Wie an de drei scheenschte Däg im Joor zur Hibbeligkeit.

Wenn dr Bebbi am Fasnachts Mäntig Moorge wenns 4ri schloot

Und in dr ganze Stadt s’ liecht abgott,

Dr Tammbour Major, MARSCH…. Si Schrei!

So füült sich dr Fasnächtler Vogelfrei!